Այսօր՝ 2025 թվականի նոյեմբերի 6-ին, ժամը մոտ 16:00-ի սահմաններում, Երևանի «Կենտրոն» քրեակատարողական հիմնարկում կտրուկ վատացել է Գյումրու քաղաքապետ Վարդան Ղուկասյանի առողջական վիճակը։ Այս մասին իր Facebook էջում հայտնել է Ղուկասյանի պաշտպան Զարուհի Փոստանջյանը։
Նրա խոսքով՝ քրեակատարողական հիմնարկի աշխատակիցները անմիջապես հրավիրել են շտապ բժշկական օգնություն, որի արդյունքում Ղուկասյանը տեղափոխվել է «Սուրբ Գրիգոր Լուսավորիչ» բժշկական կենտրոն։ Նախնական տվյալներով՝ այս պահին նա բուժօգնություն է ստանում նույն կենտրոնում։ Փաստաբանը հավելել է, որ Ղուկասյանի առողջական վիճակի մանրամասները դեռ ճշտվում են։
Ղուկասյանի կալանքի վերաբերյալ
Հիշեցնենք, որ Գյումրու քաղաքապետ Վարդան Ղուկասյանը հոկտեմբերի 21-ին կալանավորվել էր երկու ամսով։ Մի օր առաջ՝ հոկտեմբերի 20-ին, Հակակոռուպցիոն կոմիտեն տեղեկացրել էր, որ օպերատիվ-հետախուզական և գաղտնի քննչական գործողությունների արդյունքում ստացվել են տվյալներ Գյումրու համայնքի ղեկավարի և գլխավոր ճարտարապետի կողմից նախնական համաձայնությամբ կաշառք պահանջելու և ստանալու դեպքերի մասին։
Քրեական վարույթի շրջանակում հարուցվել են հանրային քրեական հետապնդումներ ու ձերբակալվել են ութ անձինք, այդ թվում՝ համայնքի ղեկավարը։ Ղուկասյանի մյուս պաշտպան Արամայիս Հարությունյանը հայտարարել է, որ իր պաշտպանյալը մեղադրանքը չի ընդունում։